1 Oketopa 2012 - Me gusta a Roma 3

Ānā, kāore anō kia tae ki rangi kē! Engari kua tae ki il colliseo!

Kia tae rawa ki roto, kātahi anō ka kitea te nui. Me te mea hoki, ehara ngā whare tauwhāinga o ēnei rā i te tino rere kē. I reira ngā tini arapiki, ngā tahataha whakanoho, ngā wāhi whakariterite o raro.

He rere kē te hanga i te wā i tae ai au ki konei, i te tau 1970. Kua mā ake, kua ruarua hoki ngā ngeru, engari ko ngā mea e toe ana, he pakari te āhua.

Ka heke ki waho tirotiro ai ki ngā mahuetanga o te foro. Ko te mea i tino rata ai

au ko te pewa whakanui a Constantinus. Ka nui ngā mahi whakanikoniko. Mehemea he pukapuka whakamārama i a au i taua wā tonu!

Kua ngenge a Aroha, ā, ka piki au ki te tihi o te puke e tata ana. Kua tōmuri rawa mo te uru atu ki te foro ake. Me waiho mo te hokinga ki Roma!

Ka heke māua i reira ki mua i te whakamaharatanga ki te Risorgimento, arā, te whakakotahitanga o Itari i ngā rau whenua, rau mana o mua.

 Kātahi anō māua ka hē i taku pōhēhē me heke torotika ki raroi kia tae ai ki te Taipā. Ehara! I te whai kē i te Taipā ahakoa kāore i te kitea atu. Nāwai rā ka tae ki tētahi marae nui, ki la Piazza del Pópolo. Ka puta atu, ā, i reira  te taramu e haere torotika atu ana. Ka ekengia, ā, kīhai rā i roa i kitea te hē o te haere. Ka heke i te taha o tētahi pāka pōuri rawa. Te waimarie hoki ka kite atu a Aroha i te piriti, ā, ka whakawhiti atu i te Taipā ki te taha e tau ana te hōtera.

Ko te mate, he tawhiti tonu i te hōtera. Kua mamae pai ngā waewae o Aroha, kua tīmata ngā puputa. Otirā, ka tae tata atu, ka peka atu ki te wharekai, ki la trattoria della Barchetta. Ka kai, ka hoki ki te hōtera, ka takoto, ka hemo!

1 Oketopa 2012 - Me gusta a Roma 2

Aī! Me tere ake te patopato, kua takaroa rawa au.

Ka mutu ngā karere rorohiko, kua rite mo te rā. I te mea kua pai te rā, i hoki tika atu ki il Vaticano. I te taenga atu ki reira kua roa rawa te rārangi e kuhu ai ki roto o Hato Pētera. Ahakoa tērā, he tere te nuku whakamua. Ka tata rawa ki te arapiki, ka arahina a Aroha ki te taha me te kī atu kāore e tukuna kia uru atu i te mea kāore ngā pokohiwi i te uhia!

I muri i te ohorere, me tōna hoa a Hoha, ka whakaaro ake, e kī, he wāhi tonu e nui ana te hanga o te tangata hei whakamiramira atu. Kāore he whiringa kē atu i te hoko i te kāmeta mō ngā pokohiwi me te hoki ki te rārangi!

Ka kuhu atu ki roto i te poho o te whare karakia, ka ngaro noa ngā raruraru o te rārangi. Kātahi anō te tangata ka mōhio ki tōna iti! Ka peka atu ki tā Mīkaere Anahera, arā, ki tā Michelángelo, ki la Pietá, uhia rā ki te rī kei patupatua anō. Ā, ka tāhurihuri haere tirotiro ai ki ngā mea mīharo huhua. 

Ka haere mā raro i reira ki tērā atu taha o te Taipā, ki te Panateone. I te mea kua tae ki te wā kai, i mātua haere māua ki al Fortunato, he wharekai tino pai. He rawe te waina mā, he reka rawa atu te carpaccio [kei raro nei]. Ko tā Aroha ko te ... prosciutto e melone – te ohorere hoki! Otirā, ka kitea te pai o te horanga i te tēpu.

Ka mutu te kai, ka hoki atu ki te Panateone. Engari te tuanui o roto! Me te mōhio, i hangaia e Marcus Agrippa!

Ka piki ake i reira ki te puna Trevi, ā, ka whiua atu ngā kapa ki roto i te wai. He mea whakamīharo te kōpikopiko haere i ngā tiriti whāiti, ānō he parari, i tētahi wāhi rongonui ki tētahi atu. Te nui hoki o te puna Trevi e tau ana i ngā whare apiapi!

Kātahi te ihu o te waka ka huri atu ki il Colosseo. Koina tonu te mahi, te kōpikopiko haere. I ia kokonga, i ia kokonga he mea ātaahua, he mea whakaoho. I rata rawa au ki te whare nei i te hekenga i te puke Quirinale.

Ko te tūmanako ka kite koe i tāku i kōrero ai i runga nei. He whare anō kei katau e aukati ana i te wāhi nei. Kei katau hoki ngā mahuetanga o tētahi o ngā mākete o nehe e kitea iho ai ngā mahi māhitihiti a ngā kaihahu – he wāhanga pou kei kōnei, he wāhanga whare kei kō, he wāhanga whakapakoko kei kō atu.

Ka kitea hoki ngā tae o Roma e rata ana au i te whakaahua nei, arā, ko te kōwhai parauri nei o te parāta, me te kiwikiwi o ngā kōhatu, kōhatu whare, kōhatu tiriti. Kei tua atu rā, kitea ai te māota o ngā paina Rōmana. Kei raro iho ko ngā mahuetanga o te foro matua o Roma, o te pūtahitanga o te tāone o nehe rā.

1 Oketopa 2012 - Me gusta a Roma

E hia kē ngā wā i kōrero ai au i te taitara rā! Engari e tika ana, me gusta mucho a Roma. Kua huri hei tino tāone māku, ā, kua whai wāhi i te taha o Río de Janeiro, o Oaxaca. Ko ngā whare rau matapihi, ko ngā tiriti whāiti, ko te noho tahi o ngā mea tawhito me ngā mea tawhito rawa, ko te pūorooro o te reo Itariano, ko te māia o te iwi, ko te aha atu, ko te aha atu!

I te ata, i puta atu au ki waho whai ai i te Taipā, i te awa parapara o Roma. Ahakoa e oma ana, ahakoa e hīkoikoi ana, ka rongo i te mana o te tāone e pupū ake ana i ngā kōhatu o ngā whare, o ngā pātū. I te whakaaro au, koinei te wāhi i oma atu ai ngā pononga i ō rātou rangatira, ngā hīhā i ngā hōia, ngā Rōmana i ngā Koti! I ngā pātū o te tarawāhi o te awa ngā kōrero a ngā tāngata rongonui mo Roma. I reira ngā kōrero no te rātaka a Hēmana Merewīra, i hoki ai ngā whakaaro ki Nuku Hiwa! I reira hoki tētahi o ngā poema a Ehera Pāuna. Kāore rawa au i whakaae atu ki tāna i mea ai, me kī, kua ngaro te Roma o mua. E kī, e kī! He aha ngā wawata i poipoia rā e ia i ana pukapuka kura?

Ka tae atu ki la isola Tiberina, ka peka atu ki te Kapotorina. Tū kau au i te mīharo atu ki ngā whare – ki ngā whare o tērā rautau, me ngā whare tānukunuku o te mākete o nehe. ¡Qué me gusta a Roma!

Ka hoki ki te hōtera, i reira a Aroha me te parakuihi e whanga mai ana. Ka mutu, ka whakahoki kōrero ki a rātou i tuku karere mai - me tētahi mea hoha noa. Engari te hunga mihikore! Hei aha rā, ka waiho ma Roma te wairua e mirimiri! 

30 Hepetema 2012 - Te hokinga ki te hōtera

Kāore e kore, kua kite koe, kīhai au i te tuhi i te aha i te hokinga ki te hōtera. Takoto rawa ki te moenga, kua hemo ki te moe!

Otirā, he nui anō tā mātou hāereere. E tata ana ki te hōtera il palazzo de la justicia, ā, kātahi anō ka tīmata te hekenga o te ua.

Na, i haere atu i reira, rapu atu ai i te wharekai, ko Toscano. Ka kaha haere te hekenga o te ua. Kua tata mākū noa, ka tahuri ki te hoko hamarara mō māua! Ka tae atu ki te wharekai engari i te kati. Hei te 8:00 rānō tuhera ai.

Koina māua i peka atu ai ki te marae o Hato Pētera. Kua tino heke te ua, ā, kua kore ngā tāngata i reira, i tua atu i ngā mea pōrangi pēnei i a māua. Ahakoa te ua, he whakamīharo te wāhi rā. Kua pīataata ngā whare katoa. I tērā atu wā i tae atu ai au i te paruparu katoa i te aukohu o Roma.

Kua mākū rawa ngā hū o Aroha, koina i huri atu ai ki te hōtera. Ka tata ki reira ka peke atu ki te wharekai o La Francescana. Ehara i te wharekai tino pai, engari he rawe te tūmau koroua i tiaki i a māua. Ko tā māua kai tuatahi ko te prosciutto con melone. Kua huri hei tino kai mā Aroha! He rawe te noho tahi o te mea totetote me te mea reka. Ko te waina te mea 'o te whare', heoi anō i pau!

Kāore māua i kai kawhe, ahakoa te tenetene a te koroua e mea ana me kai kawhe kia tutuki ai il gran amore!

30 Hepetema 2012 - Roma, cittá imperiale

Kua tae mai māua ki Roma... i muri i ngā hekenga e rua, i muri hoki i ngā hāora e hia kē! I tae ki te taunga rererangi i te 1:20 i te ahiahi, nā, i haere mai ki te takiwā nei i runga i te pahi. Ka heke i te pahi, ka heke te ua. Ko te mate, kāore māua i te mōhio i hea kē māua! Āe, i te Vaticano, engari i hea te tiriti o te hōtera, te tiriti Via Muzio Clementi?

[Kei te ua tonu, kātahi anō ka rongo i te whatitiri!]

Ka peka atu ki tētahi toa pātai mo te tiriti, kāore te tangata rā i te mōhio. Nā reira i eke ai ki runga i te tēkihi. Engari i te kōrerohanga atu i te tiriti, ka mea ia i tērā atu taha o te piazza! Na, ka heke i te tēkihi, ka tahuri ki te rapu i te tiriti. Ka tae atu, kāore i kite ake i te tohu o te hōtera. I tērā pito tētahi whare nui ngā ngā haki e iriiri ana i runga i te kūaha. Ehara i tō māua hōtera. Na, ka huri au ki te rapu i te nama 48. Kāore he tohu i waho, i tua atu i te ingoa iti i te taha o te pātene. Ka uru atu, me piki ki te papa taurua, ā, i reira te kūaha e mau ana te ingoa.

Ohorere noa a Aroha i tāna taenga mai. Me te paku hoki o te rūma. Otirā, he mā, he tata hoki ki ngā mea huhua, he pērā i a Hato Pētera, te Castelo Angelo, te aha, te aha.

Kia hoki mai a te pō nei, ka tuhia ngā kōrero mo te rerenga mai.

29 Hepetema 2012 - Taunga rererangi

Kua tae māua ki Tāmaki, ā, kei Ihumātao e tatari ana kia eke i te rererangi. He pai noa te haerenga mai ma runga i te waka rēneti. Kei waia a Aroha ki tērā momo waka!

I peka atu māua ki te whare tīhi o Kaimai i Waharoa. Te pai hoki! I kai māua i ngā pāi hēki iti, i roto rā he pēkana me te tīhi kikorangi. He kīnaki hoki i tino reka ai. Auē, kua tīmata kē te kōrero mo te kai!

I te wehenga mai i Rotorua i peka atu ki te toa pukapuka a ngā Makarauri hoko ai i te pukapuka Rauru. $120 te utu, he uhi mārō hoki. Ko te āhua nei ka tae kūware atu ki te hui houanga!

Anei ngā kawhe whakamutunga i inu ai māua i Aotearoa nei. Hei aha rā, kei te karanga mai a Itari, nō reira te nuinga o ngā ingoa! Ko te 'pango roa' tāku. I mau au i Hakahau i 'Ua Pou. Hei aha ngā mea waiū māku!

29 Hepetema 2012 - I te kāinga...

Kei te kīhini au e patopato ana i te tuhinga nei. Kei tahaki a Aroha e māhitihiti ana i ngā parapara. Pēnei ai i ngā wā katoa, ko au e aro ana ki mea kē, ā, ko Aroha e āta whakariterite ana i te whare kia pai ai te haere. Kāore e roa ka haere ki te parakuihi engari i te kai au i ngā tamarillos kei maumau! ¡Las preocupaciones de los viejos! Kāore e kore ka eke ki runga i te rererangi, kātahi anō ka whakaaro i ngā mea e tika ana kia oti – mea kāinga nei, me kura nui, mea iwi nei. Ahakoa te aha me hoko kāmera mō tērā i pakaru i te wāpu i Ta'ioha'e. Ki te kore ka hoha wawe te hunga tirotiro, aī, me kī, te hunga pānui!

Kua mutu te kai i ngā tamarillos, ānō he ate mata, pūtoto nei i roto i te karaha! No reira me huri atu ki te kaupapa o te haerenga nei. Kua roa au e mīharo atu ana ki ngā whakairo a te tohunga, a Tene Waitere.

Na, anei a Aroha e tū ana i waho i te waka e haere ai ki Tāmaki. Kei kite mai a Koa, me taku pahupahu mo te pai o ngā waka ririki!