Hoy dia

Engari rā, kua tae ki tēnei rā, te rā whakamutunga i Oropi nei!

Na te tōmuri o te moe i te pō, i tōmuri ai hoki te ohonga i te ata nei. Nō reira kāore au i huri haere i te roto. Heoi, ka parakuihi, ka hoki ki te rūma patopato ai i te rātaka nei.

I te rānui, ka wehe māua i te rūma, ko Aroha ki te tāone, ko au ki te rūma rorohiko, patopato tonu ai i ngā kōrero! I te 2:00 pm tūtaki ai māua i mua i te Rathaus. Ka tahuri ki te rapu wharekai. Te waimarie hoki, nā tētahi tangata māua i tohu atu ki te wharekai Casse-Croûte. Engari te pai o ngā kai – he pīwhi nui mā māua tahi, he panna cotta, ā, he waina no Mendoza. Engari te pai hei kai whakamutunga!

Ka peka atu ki ngā toa pūeru – auē, taua mate nōku! E rua ngā tarau, e rua ngā poraka i hokona. I te rapu a Aroha i te pēke māna, engari kāore tētahi mea e rata ana ia. Ka tīkina atu ngā pūeke i te hōtera, ka haere ma runga tereina ki te taunga rererangi. Na, kei konei māua e tatari ana.

Na, ka nui aku whakaaro mo te haerenga nei. Hei tīmatanga ko te mana o te Māori i te ao whānui nei. He rongonui te iwi, engari kia tūpato kei noho hei hunga whakangahau noa iho. Me ngana hoki tātou ki te rapu i ngā whakamāramatanga tūturu mō tērā, mō tērā. Hei tauira, i ohorere au i te nui o ngā kōrero mō Rauru kāore i roto i te pukapuka i whakaputaina mo te houanga rautau o te whare. Kāore hoki ngā kōrero taupatupatua i puta, ā, me kaha ake te tautuhituhi i ngā puna kōrero.

Te Waru o Ngāti Whaoa

Ko tētahi mea i hipa i a au ko te āta rangahau kōrero i mua i te haerenga atu. Na, i ohorere au i te rongo kāore a Rauru i tīmata i a Tene Waitere, engari i a Te Waru o Ngāti Whaoa. He iti rawa ngā kōrero mō tēnā poupou, mō tēnā poupou. I whakatau māua ko Pāora, ko Pūhaorangi rāua ko Toikairākau ērā i te poutokomanawa, ā, ko Te Kuraimonoa i waenganui. Na te taunga – ko tētahi i te tuanui, ko tētahi i te papa – me te tora o te ure, arā, i whai uri rāua tahi. Engari ko wai ka tino mōhio? Ka nui tonu ngā kōrero hei āta rapu atu.

Tēnā rā koutou, e koro mā, e Te Waru, e Ānaha, e Tene, ka nui rawa ngā mihi. Kua rangatira te ao i a koutou!

Ānaha Te Rāhui

Tere Waitere

Rārua 9 Oketopa 2012

Na, kua tae ki inanahi! E kī, e kī!

Ka oho i te ata, ā, ka heke atu ki te ... āna, te huri haere i te roto. Ka hoki ki te hōtera. Ka tae tōmuri rawa ki te parakuihi. He pai tonu.

No te 11:00 rānō puta ai i te hōtera. Ka tere atu ki te teihana tereina. Ko te tereina tuatahi e rite ana mō māua, ko to te 12:01 pm. Ka heke ki te papa 14 tatari atu ai. Ka tae mai te tereina, ka eke ki runga. Ko te mate, kāore he tūru punga nō māua, na, ka pekepeke haere i tētehei, ki tētehi. Tae rawa atu ki Göttingen, hei reira riro ai i a māua ngā tūru pai.

He tere rawa te tereina, ahakoa tērā, e whā hāora tonu te roanga o te haere. Ka tae ki Frankfurt, ka peka atu ki te tari whakamōhiohio pātai ai i te hui pukapuka. Te waimarie hoki, he tata rawa te wāhi. Ka puta atu i te tari ka kite atu a Aroha i a Haare Royal. Ka aroha hoki ia, kīhai rā i puta wawe i te tereina, i mau ai ki runga. Kotahi hāora anō ka hoki ki Frankfurt heke iho ai!

Ka haere atu māua ko Aroha ki te hui – hei te rangi whai atu tīmata ai! Engari te waimarie, i te mea i kite atu a Aroha [me ngā karu kāeaea] i a Bryan Morris rātou ko Robyn Bargh mā. E 5 meneti mātou e kōrero ana, ā, ka uru atu rātou ki a tae ai ki te hui whakatau!

Ka hoki atu māua ki te teihana, ā, ka haere ma raro i te taha o te awa i reira ki te pūtahitanga. Engari te ātaahua. Tēnā, tirohia ngā whakaahua.

Ka rapu atu i te wharekai, ā, ka uru ki roto i te mea Frankfurter. Te nui hoki o ngā pereti. Ka mutu, ka hoki ki te teihana, ka eke i te tereina, ā, ka hoki ki Hamburg. No te 11:30 rānō tae ai māua ki te hōtera. Engari te rā!

Rātahi 8 Oketopa 2012

Ko tēnei te rā i tae ai a Piri Ingarihi mā.

Ka oho i te ata, i te whiti tonu te rā. Ka heke ki waho hīkoikoi ai i te taha o te Ausseralster. Ka parakuihi, ka whakariterite i ngā pēke mo te nekenga atu ki te hōtera Atlantic. Otirā, ka waiho ma te Wedina ngā pēke e tiaki.

Ka haere ma runga tākihi ki Landungsbrücke tūtaki ai i a Ruakiri mā. Kua whakaritea tētahi haerenga me te kaiārahi, me Friedrich, i te takiwā o Sankt Pauli, he wāhi i noho ai ngā kaumoana. He tino pai te tangata rā, he pai hoki āna whakamārama, ahakoa i ngenge ētahi. Ehara ētahi mo te hītori. Ka kitea te wāhanga 'rama whero' me ngā wāhi i tīmata ai ngā Pītara.

Ka mutu ka wehe atu māua ko Aroha ki te mākete ika, ā, ka kai i te Alt Helgoländer Fischerstube. Engari te reka o te kai. Ka tīmata au ki te aalsuppe, ko te hupa tuna. I roto rā hoki te purūnu! Ko tā Aroha, ko te spaghetti me te kōura. Ka mutu te kai, ka heke ki te awa eke ai ki runga i te peripoti. I reira tētahi wahine hei kaiārahi mō māua. 

Engari ngā mahi o taua takiwā, te nui o ngā waka, me te pukumahi o ngā tāngata! Ka ū ki Landungsbrücke, ka eke ki runga i te tereina kia tae atu ai ki te teihana matua. Ka hoki ki te Wedina tiki atu ai i ngā pēke, ā, ka haere atu ki te Atlantic. Engari te pai o te rūma, he junior suite! Ka kuhu i ngā pūeru papai, ā, ka wehe ki te wharetaonga.

Kua tae hoki a Wētini hei kaiwero. I waho ngā tini rangatira Pākehā, ā, ko Piri Ingarihi hei tumuaki. Engari a Te Arawa e taukumekume puku nei i a Rauru! Otirā, i pai noa te pōhiri. He pai hoki te kōrero a Piri Ingarihi, me te mārama o āna kōrero Māori i te tīmatanga. Ko mātou ko John Turi, ko Tio Harawira ngā kaiwhakapākeha. Ka mutu, ka hoki atu ki tētahi o ngā whare nunui pahupahu ai i ngā hononga whakahoahoa o Aotearoa me Tiamani. Kāore he kōrero mo Kim Dotcom! Hei kīnaki, ko Ngāti Tarāwhai. Me mihi ki a rātou, he rawe ā rātou mahi.

Mo muri, ko te timotimo kai. Otirā, he pai tonu te waina, na Tohu. Kātahi ka tīmata te kārangaranga i ngā rōpū kia haere atu ki te āta tirotiro ki a Rauru. Nāwai rā kua uru atu au hoki hei kaiārahi. He mahi pārekareka ki a au. I reira hoki a Ruakiri mā hei kaiārahi – ka mau te wehi. Me taku waimarie hoki i a Pāora Tapihana e kōrero ana i tāna e mōhio ana, ā, ko tā māua he mārohirohi haere i ngā tikanga o tērā whakairo, o tērā whakairo. Hei reira uru atu ai ā māua kōrero ki roto i ā māua mahi ārahi!

Kia tere rā, Uenuku!

Kua tōmuri rawa ahau! Tēnā, kōkiri!

I te ata, kāore i wehe atu ki te hīkoikoi, na te kaha o te ua. Ka parakuihi, ka haere atu ki te wharetaonga ma runga tākihi kia tae ai mo te 11:00. Ka pai, i reira a Ngāti Tarāwhai! Ka hui ki roto i te whare kauhau kia tīmata ai ngā mahi o te rā. I tua atu i te 50 tāngata i tae atu ki te ako i te haka, i te mahi poi, i te raranga. Hei tīmatanga, ka tū ki te waiata.

He ākonga tino pai ngā Tiamana, ka uru kaha ki roto i ngā mahi katoa. Ko ētahi i hoki ki te mea haka mo te wā tuarua! Kua tae mai hoki a Te Reo Te Pania rāua ko Leigh Mōrunga. He mema a Leigh no te hunga o Te Kīngi o ngā Raiona, ā, kua roa e noho ana i Hamburg. I reira hoki muchas latinas, ko tētahi nō Oahaka! Ka nui ngā wā i kōrero ai au i te Paniora i konei, especialmente con los portugueses.

Ka mutu ngā mahi, ka wehe atu mātou ki te tāone. He tino porotetene te āhua! He iwi pukumahi, he iwi āta māherehere, āta whakariterite, āta whakaotioti. Koina e kaha ai te whenua nei! Anei te Rathaus, te whare o te kaunihera, hei tauira nō tō rātou kaha.

 Ka haere tonu ki Sankt Georg rapu atu ai i te wharekai. I te mutunga ake ka kai portugués anō! Ka mutu, ka hoki ki te hōtera.

Ka oho moata ki te ata o te Rātapu kia tae ai ki te wharetaonga mo te kawa i a Rauru. Ehara! Ka tae atu kua tata mutu kē te kawa. Kua rere kē te hāora i a Tūhourangi i tētahi hui i te rangi i mua, ā, kāore tētahi i whakamōhio mai ki a mātou ko ngā Kereopa, ko Ngāti Tarāwhai. Auē!

Heoti, ka mutu, ka uru atu ki te tango whakaahua. Kua tāpiritia ērā hei whakaaturanga. Hei muri atu nei kōrero ai mō ngā whakairo.

Tokomaha ngā tāngata i tae atu, arā, ko Pāora Tapihana, ko Tio Harawira, ko Haare Royal, ko wai atu, ko wai atu. Me te tokomaha o ngā Tiamana me ngā tāngata o Aotearoa i tae mo te whakatau, ko te whare whawhao o Te Aokapurangi! Na Te Pōroa ngā kōrero i wāwāhi. Ka kōrero hoki a Wülf Köpke, te rangatira o te wharetaonga. Na, na te māngai whenua o Aotearoa, na Robert Rider i kōpani.

Ka mutu te whakatau, ka tīmata ngā kauhau me ngā akoranga mahi. Ka haere atu ki te kauhau a Pāora, ā, ka peka atu ki rāwāhi i te tiriti kai kawhe ai i te taha o Retihia. Ka hoki ki te wharetaonga kua tū kē a Ruakiri mā ki te haka. Ūmere kau ana ngā tāngata i tā rātou mahi. Ka mau te wehi! Me mihi ki a Parehinga – he tohunga ia ki te karawhiu poi. Kāore rawa au i kite i a ia e raruraru ana!

Ko te tikanga ka noho ki te wharetaonga hapa ai, engari i wehe atu māua ki te wharekai o Brodersen. Ratorato ai rātou i ngā kai o Hamburg ake. Te reka hoki! Ka kai au i te labskaus. E ai ki ētahi ehara i te pai, engari ko tāku i kai ai, he reka. Kei raro nei te whakaahua. Ka hoki ki te hōtera me ngā whetū i runga e tīramarama ana!

Auē! I hea kē?

Āna, e mōhio ana ahau, he maha ngā rangi e ngaro ana! Ko te nui o ngā mahi me te mau i te pukapuka, i The Passage na Justin Cronin – te pai hoki – ngā take i raruraru ai!

Ka oho i te ata ka hīkoikoi i te tahatika o te roto o Aussenalster. Tokomaha ngā tāngata, ā, he pūeru tika rawa ō rātou! Ka hoki, ka parakuihi. He tino reka te kai i te hōtera Wedina nei. Te pai o te kawhe, me te hāmu, me ngā momo parāoa. Kātahi te ua ka tino heke! Ka mau ki te rūma.

Ka āhua pai te rangi, ka haere atu ki te kai i te Café Gnosa. Tokoiti te hunga ehara i te takatāpui. Ka peka atu ki te tiki makahīni, e rua noa iho kāore he tāne tāhanga o roto! Otirā, he reka te kai. Ka hoki ki te hōtera, kua heke anō te ua. Koina te rā!

Ka oho i te Rārima, e pai ana te rangi, he kōpatapata noa iho. Ka hīkoikoi anō i te roto. Ka parakuihi, ā, ka wehe atu ki te rapu i te wharetaonga. Tae rawa atu ki reira kua tātā te ua, kua mākū noa māua! Ka hoki ki te teihana tereina kai ai i ngā parāoa hukahuka, ā, ka hoki ki te hōtera hīrere ai. Na, ka moe, kāore he mahi kē atu i te kaha o te ua.

Ka ahiahi, ka haere ma runga tākihi ki te wharetaonga tūtaki ai i a Ruakiri mā. Ko māua anahe i tae atu! I te haere mai rātou i Hōrana ma runga motukā me te pōhēhē he haerenga poto. Ehara! Kua whakaritea he kai mā mātou, nō reira ka noho i te taha o Julia rātou ko Theresa, ko tētahi atu kai ai.

Ka mārama atu ehara a Ruakiri mā mo te tae atu, ka hoki māua ma raro ki Sankt Georg, ki te wāhanga o Hamburg e noho ana māua. Ka peka atu ki te wharekai portugués kai ai i ngā tapas, ā, ka hoki ki te hōtera.

3 Oketopa 2012 - TE WEHENGA

I oto moata, me kī, i mua i te ata! Kei hemo i te ngenge. Otirā, ka puta ki waho hīkoikoi ai, ahakoa i te pōuri tonu. Ko tāku he poroporoaki haere i ngā whare, i te awa, i ngā arawhiti, me kī, i te wāhi que me gustó tanto.

Ka mutu te parakuihi, ka haere ki te tūranga pahi kia tae atu ai ki te taunga rererangi. Ka whai wā ki te kai rustichella i te mea, i te nui o ngā mahi, kāore māua i kai pizza me tā Hāmihi i whakahau mai ai! Ā, me te espresso kei tahaki.

He tere rawa te rerenga atu ki Hamburg [kei te rapu tonu māua ko Aroha i te whakamāoritanga pai o te ingoa nei]. Engari a Tiamani, te mā, te nahanaha! He rawe te hōtera e noho ana māua, ko te Wedina. Ko tā rātou kia kiia ai he wāhi pūreo. He nui ngā pukapuka kua hainatia e ngā kaitito, ā, mā ngā manuhiri e pānui!

Ka tau ki te rūma, ka wehe atu ki te rapu wharekai, ā, ka tae ki Kajüte. Ka uru, ka heke te ua!

Koinei te tirohanga atu i te matapihi. He rawe te kai me te waina – he pinot noir nō Baden. E rua ngā ipu i pau i a au - me te riesling i pau i te hōtera! Heoi, ko te mea i turakina ai a Aroha ko te pūrini. Auē, taukiri ē! Taima mo te moe, e kare.

2 Oketopa 2012 - EL REGRESO

Ka oho i te ata, ā, ka mea mai ngā waewae, "Ehara koe mo te hīkoikoi i te ata nei!" Nā reira i moe roa ai.

Ka maranga, ka parakuihi, ka patopato i te rātaka, ā, ka takaroa noa. Ka wehe atu i te hōtera, ka haere tika ki il castel Sant'Ángelo. I hangaia hei whare kōiwi mo te emepara Hāriana, ā, ka huri hei kāinga mō ngā Papa.

Ka tata ki te rānui, ka wehe atu ki il Vaticano. Hei tīmatanga ka peka atu ki Dal Toscano tina ai. He aha tā Aroha kai tuatahi? Koina, he tika tāu, ko te prosciutto e melone! Ka kai au i ngā fritti mista, he pai noa.

Ka mutu te kai, ka haere atu ki el Musei Vaticano. Engari te tokomaha o ngā tāngata! Engari hoki ngā mea i kite ai! Kia kite-ā-tinana i ngā whakapakoko i mōhio ai au i taku tamarikitanga. Kei wareware he tamaiti kai hītori, kai pūrākau tēnei. Ā, ko Apollo tērā, ko Hercules tērā. Me te ātaahua hoki o ngā taonga Ihipiana! Ko tētahi mea tino pai ko te whakapakoko o te kaihī kaumātua. Koina tā Hemingway i kite ai i mua i te tito i tāna pukapuka ko Te Koroua me te Moana? Kei tahaki he kohinga whakaahua.

Ahakoa ngā tini taonga, kāore tonu au i te rite kia kite i te tuanui o la capella Sistina. Ka heke ngā roimata i te mātakitaki ake i te matikara o te Atua e toro atu ana ki tō Ārama. Tokoiti nei ngā tohunga o te taumata o Michelángelo, tokoiti rawa.

Ka hoki ngenge ki te hōtera, ā, nāwai rā kua hemo, ehara mo te oho ake!

1 Oketopa 2012 - Me gusta a Roma 3

Ānā, kāore anō kia tae ki rangi kē! Engari kua tae ki il colliseo!

Kia tae rawa ki roto, kātahi anō ka kitea te nui. Me te mea hoki, ehara ngā whare tauwhāinga o ēnei rā i te tino rere kē. I reira ngā tini arapiki, ngā tahataha whakanoho, ngā wāhi whakariterite o raro.

He rere kē te hanga i te wā i tae ai au ki konei, i te tau 1970. Kua mā ake, kua ruarua hoki ngā ngeru, engari ko ngā mea e toe ana, he pakari te āhua.

Ka heke ki waho tirotiro ai ki ngā mahuetanga o te foro. Ko te mea i tino rata ai

au ko te pewa whakanui a Constantinus. Ka nui ngā mahi whakanikoniko. Mehemea he pukapuka whakamārama i a au i taua wā tonu!

Kua ngenge a Aroha, ā, ka piki au ki te tihi o te puke e tata ana. Kua tōmuri rawa mo te uru atu ki te foro ake. Me waiho mo te hokinga ki Roma!

Ka heke māua i reira ki mua i te whakamaharatanga ki te Risorgimento, arā, te whakakotahitanga o Itari i ngā rau whenua, rau mana o mua.

 Kātahi anō māua ka hē i taku pōhēhē me heke torotika ki raroi kia tae ai ki te Taipā. Ehara! I te whai kē i te Taipā ahakoa kāore i te kitea atu. Nāwai rā ka tae ki tētahi marae nui, ki la Piazza del Pópolo. Ka puta atu, ā, i reira  te taramu e haere torotika atu ana. Ka ekengia, ā, kīhai rā i roa i kitea te hē o te haere. Ka heke i te taha o tētahi pāka pōuri rawa. Te waimarie hoki ka kite atu a Aroha i te piriti, ā, ka whakawhiti atu i te Taipā ki te taha e tau ana te hōtera.

Ko te mate, he tawhiti tonu i te hōtera. Kua mamae pai ngā waewae o Aroha, kua tīmata ngā puputa. Otirā, ka tae tata atu, ka peka atu ki te wharekai, ki la trattoria della Barchetta. Ka kai, ka hoki ki te hōtera, ka takoto, ka hemo!

1 Oketopa 2012 - Me gusta a Roma 2

Aī! Me tere ake te patopato, kua takaroa rawa au.

Ka mutu ngā karere rorohiko, kua rite mo te rā. I te mea kua pai te rā, i hoki tika atu ki il Vaticano. I te taenga atu ki reira kua roa rawa te rārangi e kuhu ai ki roto o Hato Pētera. Ahakoa tērā, he tere te nuku whakamua. Ka tata rawa ki te arapiki, ka arahina a Aroha ki te taha me te kī atu kāore e tukuna kia uru atu i te mea kāore ngā pokohiwi i te uhia!

I muri i te ohorere, me tōna hoa a Hoha, ka whakaaro ake, e kī, he wāhi tonu e nui ana te hanga o te tangata hei whakamiramira atu. Kāore he whiringa kē atu i te hoko i te kāmeta mō ngā pokohiwi me te hoki ki te rārangi!

Ka kuhu atu ki roto i te poho o te whare karakia, ka ngaro noa ngā raruraru o te rārangi. Kātahi anō te tangata ka mōhio ki tōna iti! Ka peka atu ki tā Mīkaere Anahera, arā, ki tā Michelángelo, ki la Pietá, uhia rā ki te rī kei patupatua anō. Ā, ka tāhurihuri haere tirotiro ai ki ngā mea mīharo huhua. 

Ka haere mā raro i reira ki tērā atu taha o te Taipā, ki te Panateone. I te mea kua tae ki te wā kai, i mātua haere māua ki al Fortunato, he wharekai tino pai. He rawe te waina mā, he reka rawa atu te carpaccio [kei raro nei]. Ko tā Aroha ko te ... prosciutto e melone – te ohorere hoki! Otirā, ka kitea te pai o te horanga i te tēpu.

Ka mutu te kai, ka hoki atu ki te Panateone. Engari te tuanui o roto! Me te mōhio, i hangaia e Marcus Agrippa!

Ka piki ake i reira ki te puna Trevi, ā, ka whiua atu ngā kapa ki roto i te wai. He mea whakamīharo te kōpikopiko haere i ngā tiriti whāiti, ānō he parari, i tētahi wāhi rongonui ki tētahi atu. Te nui hoki o te puna Trevi e tau ana i ngā whare apiapi!

Kātahi te ihu o te waka ka huri atu ki il Colosseo. Koina tonu te mahi, te kōpikopiko haere. I ia kokonga, i ia kokonga he mea ātaahua, he mea whakaoho. I rata rawa au ki te whare nei i te hekenga i te puke Quirinale.

Ko te tūmanako ka kite koe i tāku i kōrero ai i runga nei. He whare anō kei katau e aukati ana i te wāhi nei. Kei katau hoki ngā mahuetanga o tētahi o ngā mākete o nehe e kitea iho ai ngā mahi māhitihiti a ngā kaihahu – he wāhanga pou kei kōnei, he wāhanga whare kei kō, he wāhanga whakapakoko kei kō atu.

Ka kitea hoki ngā tae o Roma e rata ana au i te whakaahua nei, arā, ko te kōwhai parauri nei o te parāta, me te kiwikiwi o ngā kōhatu, kōhatu whare, kōhatu tiriti. Kei tua atu rā, kitea ai te māota o ngā paina Rōmana. Kei raro iho ko ngā mahuetanga o te foro matua o Roma, o te pūtahitanga o te tāone o nehe rā.

1 Oketopa 2012 - Me gusta a Roma

E hia kē ngā wā i kōrero ai au i te taitara rā! Engari e tika ana, me gusta mucho a Roma. Kua huri hei tino tāone māku, ā, kua whai wāhi i te taha o Río de Janeiro, o Oaxaca. Ko ngā whare rau matapihi, ko ngā tiriti whāiti, ko te noho tahi o ngā mea tawhito me ngā mea tawhito rawa, ko te pūorooro o te reo Itariano, ko te māia o te iwi, ko te aha atu, ko te aha atu!

I te ata, i puta atu au ki waho whai ai i te Taipā, i te awa parapara o Roma. Ahakoa e oma ana, ahakoa e hīkoikoi ana, ka rongo i te mana o te tāone e pupū ake ana i ngā kōhatu o ngā whare, o ngā pātū. I te whakaaro au, koinei te wāhi i oma atu ai ngā pononga i ō rātou rangatira, ngā hīhā i ngā hōia, ngā Rōmana i ngā Koti! I ngā pātū o te tarawāhi o te awa ngā kōrero a ngā tāngata rongonui mo Roma. I reira ngā kōrero no te rātaka a Hēmana Merewīra, i hoki ai ngā whakaaro ki Nuku Hiwa! I reira hoki tētahi o ngā poema a Ehera Pāuna. Kāore rawa au i whakaae atu ki tāna i mea ai, me kī, kua ngaro te Roma o mua. E kī, e kī! He aha ngā wawata i poipoia rā e ia i ana pukapuka kura?

Ka tae atu ki la isola Tiberina, ka peka atu ki te Kapotorina. Tū kau au i te mīharo atu ki ngā whare – ki ngā whare o tērā rautau, me ngā whare tānukunuku o te mākete o nehe. ¡Qué me gusta a Roma!

Ka hoki ki te hōtera, i reira a Aroha me te parakuihi e whanga mai ana. Ka mutu, ka whakahoki kōrero ki a rātou i tuku karere mai - me tētahi mea hoha noa. Engari te hunga mihikore! Hei aha rā, ka waiho ma Roma te wairua e mirimiri! 

30 Hepetema 2012 - Te hokinga ki te hōtera

Kāore e kore, kua kite koe, kīhai au i te tuhi i te aha i te hokinga ki te hōtera. Takoto rawa ki te moenga, kua hemo ki te moe!

Otirā, he nui anō tā mātou hāereere. E tata ana ki te hōtera il palazzo de la justicia, ā, kātahi anō ka tīmata te hekenga o te ua.

Na, i haere atu i reira, rapu atu ai i te wharekai, ko Toscano. Ka kaha haere te hekenga o te ua. Kua tata mākū noa, ka tahuri ki te hoko hamarara mō māua! Ka tae atu ki te wharekai engari i te kati. Hei te 8:00 rānō tuhera ai.

Koina māua i peka atu ai ki te marae o Hato Pētera. Kua tino heke te ua, ā, kua kore ngā tāngata i reira, i tua atu i ngā mea pōrangi pēnei i a māua. Ahakoa te ua, he whakamīharo te wāhi rā. Kua pīataata ngā whare katoa. I tērā atu wā i tae atu ai au i te paruparu katoa i te aukohu o Roma.

Kua mākū rawa ngā hū o Aroha, koina i huri atu ai ki te hōtera. Ka tata ki reira ka peke atu ki te wharekai o La Francescana. Ehara i te wharekai tino pai, engari he rawe te tūmau koroua i tiaki i a māua. Ko tā māua kai tuatahi ko te prosciutto con melone. Kua huri hei tino kai mā Aroha! He rawe te noho tahi o te mea totetote me te mea reka. Ko te waina te mea 'o te whare', heoi anō i pau!

Kāore māua i kai kawhe, ahakoa te tenetene a te koroua e mea ana me kai kawhe kia tutuki ai il gran amore!