1 Oketopa 2012 - Me gusta a Roma 2

Aī! Me tere ake te patopato, kua takaroa rawa au.

Ka mutu ngā karere rorohiko, kua rite mo te rā. I te mea kua pai te rā, i hoki tika atu ki il Vaticano. I te taenga atu ki reira kua roa rawa te rārangi e kuhu ai ki roto o Hato Pētera. Ahakoa tērā, he tere te nuku whakamua. Ka tata rawa ki te arapiki, ka arahina a Aroha ki te taha me te kī atu kāore e tukuna kia uru atu i te mea kāore ngā pokohiwi i te uhia!

I muri i te ohorere, me tōna hoa a Hoha, ka whakaaro ake, e kī, he wāhi tonu e nui ana te hanga o te tangata hei whakamiramira atu. Kāore he whiringa kē atu i te hoko i te kāmeta mō ngā pokohiwi me te hoki ki te rārangi!

Ka kuhu atu ki roto i te poho o te whare karakia, ka ngaro noa ngā raruraru o te rārangi. Kātahi anō te tangata ka mōhio ki tōna iti! Ka peka atu ki tā Mīkaere Anahera, arā, ki tā Michelángelo, ki la Pietá, uhia rā ki te rī kei patupatua anō. Ā, ka tāhurihuri haere tirotiro ai ki ngā mea mīharo huhua. 

Ka haere mā raro i reira ki tērā atu taha o te Taipā, ki te Panateone. I te mea kua tae ki te wā kai, i mātua haere māua ki al Fortunato, he wharekai tino pai. He rawe te waina mā, he reka rawa atu te carpaccio [kei raro nei]. Ko tā Aroha ko te ... prosciutto e melone – te ohorere hoki! Otirā, ka kitea te pai o te horanga i te tēpu.

Ka mutu te kai, ka hoki atu ki te Panateone. Engari te tuanui o roto! Me te mōhio, i hangaia e Marcus Agrippa!

Ka piki ake i reira ki te puna Trevi, ā, ka whiua atu ngā kapa ki roto i te wai. He mea whakamīharo te kōpikopiko haere i ngā tiriti whāiti, ānō he parari, i tētahi wāhi rongonui ki tētahi atu. Te nui hoki o te puna Trevi e tau ana i ngā whare apiapi!

Kātahi te ihu o te waka ka huri atu ki il Colosseo. Koina tonu te mahi, te kōpikopiko haere. I ia kokonga, i ia kokonga he mea ātaahua, he mea whakaoho. I rata rawa au ki te whare nei i te hekenga i te puke Quirinale.

Ko te tūmanako ka kite koe i tāku i kōrero ai i runga nei. He whare anō kei katau e aukati ana i te wāhi nei. Kei katau hoki ngā mahuetanga o tētahi o ngā mākete o nehe e kitea iho ai ngā mahi māhitihiti a ngā kaihahu – he wāhanga pou kei kōnei, he wāhanga whare kei kō, he wāhanga whakapakoko kei kō atu.

Ka kitea hoki ngā tae o Roma e rata ana au i te whakaahua nei, arā, ko te kōwhai parauri nei o te parāta, me te kiwikiwi o ngā kōhatu, kōhatu whare, kōhatu tiriti. Kei tua atu rā, kitea ai te māota o ngā paina Rōmana. Kei raro iho ko ngā mahuetanga o te foro matua o Roma, o te pūtahitanga o te tāone o nehe rā.